LGS a FNEL distanzéiere sech vun neier Scouts-Beweegung
© RTL Télé Lëtzebuerg
Et ass riets vu ganz anere Mentalitéiten. Net iwwerall wou Scout drop steet ass och Scout dran.
Den Daachverband vun de Lëtzebuerger Scouten, den d'LGS, also d'Lëtzebuerger Guiden a Scouten an d'FNEL „d'Fédération des Eclaireurs et Eclaireuses du Luxembourg“ ënnert sech groupéiert, wëll sech formell vun engem néie Mouvement distanzéieren, deen sech „Europa-Scoute vu Lëtzebuerg“ nennt. Et ass riets vu ganz anere Mentalitéiten.
Net iwwerall vu Scout drop steet ass och Scout dran. Zanter knapp engem Joer gëtt et e neie Scouts-Mouvement, deen sech hei am Land profiléiert. Dës Europa-Scoute goufen ënner anerem vum Äerzbëschof mat gegrënnt a stinn deemno och der Kierch ganz no, ma vertrieden awer eng ganz konservativ Form vu Scoutism. De Begrëff Scouten ass u sech net geschützt, dat heescht, dass all Mënsch e Scoutsgrupp kann opmaachen. Et gëtt awer e Welt-Scouts-Mouvement an deen erkennt déi jeeweileg Federatiounen oder Clibb un. Déi nei Europa-Scouten, déi et zanter engem Joer ginn, goufe bis ewell weltwäit net unerkannt, esou de Georges Krombach, President vum Daachverband „Scouting in Luxembourg“.
Och d'LGS an d'FNEL, déi zu Lëtzebuerg bal 9.000 Scouten ënner sech regroupéiere, wëllen sech elo formell vun dëse Scouten distanzéieren. Si géingen nämlech fir Valeure stoen, fir déi d'LGS an d'FNEL net stinn. Zum Beispill mussen d'Meedercher eng Juppe undoen an d'Jongen eng Box oder et muss ee bestuet sinn, wann een an enger Koppel lieft.
Toleranz, Respekt vun der Natur, Zesummen eng besser Welt schafen, Reesen, Aktivitéiten a Gruppen, vu Jonke fir Jonker, dat sinn déi traditionell Scouts-Valeuren déi d'LGS an d'FNEL wëlle promouvéieren, sou nach de Georges Krombach. D'Kierch duerch d'Hannerdier erabréngen, nees Jongen a Meedercher trennen, kuerz den ale Scoutism aus de 50. Jore mat allem wat dat mat sech bréngt promouvéieren, dat soll am Beschten an der Vergaangenheet bleiwen.
