Prolog
Proviant, wat een soll mathuelen, an wat net
E Hike vum 2.- 4. November 2016
mam Hong Kiu Choi, Félix Weber,
Max Bichel a Yannick Streitz
Méindeg, 17. Oktober:
“Salut Félix, Loscht, eng Kéier zesumme mat mir en Hike z’ënnerhuelen? Wa mer e virum 15. Januar duerchgefouert hu, kréie mer eise Mérite Jeunesse Brevet nach dëst Joer.”
Dem Hong Kiu seng Iddi, matzen am Wanter dräi Deeg dobaussen ze verbréngen, huet scho vu vireran e bësse mëll geklongen. Bei enger Joresduerchschnëttstemperatur vun ongeféier 12 Grad wier et och net grad di beschten Iddi gewiescht, grad matzen am Wanter esou e Projet duerchzeféieren!
No e puer kuerze Wuertwiesselen hat ech en dann iwwerzeegt, schonn an der Allerhellegevakanz lasszezéien. Mee du ware mer mat engem ganz anere Problem geplot: eis sinn nëmmen nach 2 Deeg fir d’Plange bliwwen!
Wou ech wollt higoe, war scho laang kloer: d’Mëllerdall, mat Sécherheet eng vun de schéinste Géigenden am Land. Esou huet et och net vill gebraucht, de Kiu dervun z’iwwerzeegen. Mëttels Brochure si mer dunn op de Mullerthal Trail gestouss, en 100 Kilometer laange Wee queesch duerch d’Dall. Mir hunn eis dunn e 50 km laangen Deel erausgesicht a scho war de Plang gemaach. Et sollt vu Grolënster aus fortgoen, a Richtung Norden, uewen e klengen Ëmwee bis bei eng vun eis gelounten Holzhütt zu Miedernach, duerno e Stéck Richtung Nord-Oste bis bei Bigelbach, a vun do aus erëm südlech an am Bou iwwert de Schiessentümpel bis zréck op Grolënster. Déi zweet Iwwernuechtung hate mir an engem Bivouac matzen am Bësch geplangt.
D’ Fro deen ech (Hong Kiu) mir gestallt hunn war wat fir ee Proviant den Félix an ech fir di 2 Deeg brauchen. Mir hunn zesummen décidéiert dat mir den éischten Owend Wierschtercher grillen , den nächsten Dag Mëttes Ravioli kachen an dann den Owend Sauerkraut mat Wierschtercher an dee leschten Dag Mëttes eng kleng ‘5-Min Terine’
De ganzen Proviant hu mir ënnert eis opgedeelt, soudatt den Félix an ech nach genuch Plaz am Rucksack hunn an och net zevill mussen droen. Ech hunn nach fir eis Zwee 6 petits pains kaaft fir d’ Grillwurschten. An fir mech selwer hunn ech nach e puer Zerealienriegeln kaaft fir ënnerwee. Während dem Hiken wäert ech materliewen firwat déi Zort vun Proviant net gutt ass fir meng Been.
Mëttwoch, 2. November:
Et huet ee gutt gemierkt, dass et net méi Summer war, virun Allem, well de Rucksak bestëmmt 15 Kilogramm gewien huet woubäi 1,5 Kilogramm dovunner nëmmen Raviolisbéchsen sinn! Ech hunn beim apaken direkt bemierkt dat di 6 Petits Pains immens vill Plaz ofhuelen an och die ‘5-min Terine’ och wann si guer näischt weit huelt si mat hirer Form ze vill Plaz fort. Ech wollt nach Nutella an Kellogs mathuelen mee well do keng Plaz war sollen di aner dat droen. Trotzdem war ëmmer nach net genuch Plaz fir dat wichteg Proviant. Meng Décisioun stoung fest: Minimum vun Kleeder mathuelen, d.h. keng Ersatzkleeder. Sou krut ech nach grad alles dran. Nutella an Kellogs hunn ech an ee Bac dragesat an an den Auto bruecht. An dëser Zäit wosst ech nach net dat et ee Feeler wor sou ee Proviant matzeschleefen.
Nodeems d’Grillwurschte fir den Owend dann och nach agepaakt ware, goung et fir e läscht Mëttegiessen an der Zivilisatioun fir d’Éischt nach bei d’Maison des Gourmets, ee chinesesche Buffet-Restaurant, schliisslech soen se jo “en eidle Mo ass eng uerech Plo”. Am Restaurant ass dann och de Yannick derzou gestouss, mat deem mer dann nach eng Kéier eise Mo gefëllt hu, während am Hannergrond eng ganz schrecklech chinesesch Versioun vu Lemon Tree gelaf ass. Net auszehalen.
Nodeems mer dann zu Grolënster ukomm waren waart den Max schonn mat senger Mamm am Auto op eis. Ech hunn direkt bemierkt dat di 3 och net genuch Plaz an hiren Rucksak haten. Ech hunn also an der leschter Minutt den Nutella an den Kellogs zréck bruecht éier dem Max seng Mamm fortgefuer war. Nach de rescht vum Material verstaut, sech op der Kaart orientéiert, an schonn geet et lass mat eisem Hike.
