Dag 2, Donneschdeg
Jo, mir hunn eis et gutt goe gelooss op dem flotte Camping. Eisen Moiesiessen krute mir op der Plaz um Camping. Et war vläicht och dowéinst, dass mer eng Zäitche gebraucht hu fir fortzekommen. Wéi mer dunn awer, mat enger “klenger” Verspéidung, endlech eise Rucksak um Réck hate, ass et ëmsou méi séier virugaange, soudatt mer schonn e bësse méi spéit erëm mat Zäit waren.
Zu Mëtteg hu mer eis Ravioli aus der Béchs gemaach, mat enger praktescher Gasfläsch fir ënnerwee. Eng Béchs Ravioli vun 400g geet fir mech deck duer.
Di Léit, déi laanschtkomm sinn, hunn eis zwar e bësse schif ugekuckt, mee mat de waarme Béchsen an der Hand an engem gudden Appetit war eis dat dee Moment och relativ egal. Nodeems mir eis sat gefriess hunn mat Ravioli hunn ech mäin Rucksack rëm ugedo. Ech hunn direkt gemierkt dat deen méi liicht ginn war. Et wier besser gewiergt keng Raviolisbéchsen matzehuelen, och wann déi schmaachen. Am beschten wier einfach frësch Ravioli an enger Plastikstut, Gewiicht wier manner an et ass méi einfach an den Rucksak ze verstauen.
An der Fiels ukomm hu mer eng kleng Picknickpaus gemaach. Zerealienriegeln hëllefen an sou Situatiounen immens gutt well se räich un Nährstoffer sinn an ee klengen Energie-Boost ginn. Während ech di lecker ‘Cornys’ frupse, hat den Félix e klenge Panik-Moment, éier hien erëm aus enger automatescher Toilett, an där hien sech onfräiwëlleg agespaart hat. Hien hat “Escape Rooms” ëmmer e bëssen anescht virgestallt. Mee bon, wéinstens war deen heite gratis.
Obwuel mer géinter Nomëtteg zwar eppes un Tempo verluer hu, si mer owes, no knapp 17 Kilometer trëppele virun der berechenter Zäit bei der Owesplaz am Bësch ukomm. (Also meng Berechnunge waren et jo net.) Praktescherweis hat eis dee Fierschter, och en ale Scout, scho genuch Holz bei d’Feierplaz geluecht, soudass d’Feier séier gebrannt huet. De Bivac, dee mer tëschent 2 Beem gespaant hu, stoung och séier, war jo net deen éischte fir eis.
Trotzdem ass d’Nuecht séier am Bësch ukomm, nach viru sechs Auer war et stackdäischter ronderëm eis. Schnell ee Lagerfeier gemat an schonn gëtt giess. Sauerkraut mat Wierschtercher sinn ëmmer gutt op engem Hike, huelen net souvill Plaz fort an schmaacht och ganz gutt. Allerdéngs soll een déi net an enger Béchs kafen. Ech hat schonn Erfahrung domat, de Goût an der Béchs ass einfach schrecklech, an d’ Qualitéit dovunner war miserabel. Dofir am beschten aus dem Glas (den Sauerkraut). Natierlech alles an enger Gamelle kachen loossen. Manner Gewiicht, manner Stress.
Sou koum et, dass mer nom Owesiessen, all relativ fréi schlofe waren. Et hat och kee wierklech Loscht, ze waarde, bis et nach mi kal ginn ass, mir hunn eis um zéng schonn den Aar*** ofgefruer dobaussen.
